Hrafnagilsskóli

Skólakór Hrafnagilsskóla hélt vortónleika sína í Aldísarlundi um daginn. Kórinn notaði skógarskýlið sem svið og áheyrendur sátu í brekkunni á móti. Þrátt fyrir talsverða gjólu niður við skóla var nánast logn uppi í lundinum og fór vel um alla.

Stjórnandi kórsins er María Gunnarsdóttir tónmenntakennari og Daníel Þorsteinsson píanóleikari lék undir. Kórinn söng mjög fallega og hljómaði söngurinn vel upp í brekkunni og þegar á leið mátti einnig heyra skógarþröst taka undir í nálægu tré. Hér eru nokkrar myndir frá tónleikunum.

Velheppnaðir skóladagar sem tileinkaðir voru umhverfismálum tókust feikivel. Á hverju stigi var unnið að ýmsum verkefnum og í lok föstudags var farið í ratleik þar sem nemendur úr öllum bekkjum röðuðust saman í hópa sem þurftu að svara ýmsum spurningum sem snertu ólík viðfangsefni.

Meðal verkefna voru ýmis þrifamál, t.d. var umhverfishreinsun á hendi miðstigs. Þau sópuðu plan og stéttar svo vel að við getum sparað okkur stóra sóparabílinn í vor. Þá fór fram mikil ruslhreinsun á opnum svæðum, úr girðingum og skjólbelturm, í lækjum og skurðum svo að nú finnst varla nokkurt snifsi á foki um svæðið frá Jólagarði að Reyká.

Eldstæði í Aldísarlundi var hlaðið upp og þéttur lerkilundur grisjaður og unnið í stígagerð á svæðinu. Sum verkefni voru innan dyra. T.d. prentaði listahópur á léreft og saumaði poka til að nota í stað plastpoka við söfnun á endurvinnsluefni. Einnig voru búin til merkispjöld með áminningum um sparnað í orkunotkun og handþurrkum sem fest verða á viðeigandi staði í skólanum. Fatnaður var endurunninn, bæði búin til ný föt og hálsfestar.

Við fengum 2 gesti, þau Sigurð Inga Friðleifsson sem fræddi orkuhópinn um orkunotkun og endurnýjanlega orkugjafa og Söndru Grettisdóttur sem fræddi þau m.a. um hreinsun sundlaugarvatns með ósoni.

Þá má ekki gleyma vettvangsferðum; 1. – 4. bekkur fór í Sagaplast og fræddist um flokkun og endurvinnslu og heimsótti einnig Norðurorku og hópur af unglingastigi heimsótti Moltu, jarðgerðarstöðina á Þveráreyrum.

Á yngsta stigi voru ýmsar rannsóknir um ræktun settar af stað, t.d við hvaða skilyrði spíra kartöflurnar best. Þau tíndu rusl af skólalóðinni, gerðu ýmsar mælingar utan dyra og innan ásamt fleiri verkefnum.

Hér á síðunni eru tenglar þar sem skoða má myndir af nemendum við vinnu sína.

• Myndir frá ratleiknum
• Myndir frá yngstastigi
• Myndir frá miðstigi
• Myndir frá unglingastigi

Samfélagið í hnotskurn blasti við á sviði Laugarborgar í gærkvöldi þegar nemendur miðstigs settu upp atriði úr söngleiknum Fólkið í blokkinni eftir Ólaf Hauk Símonarson með lögum Jón Ólafssonar. Þar mátti sjá fólk úr öllum stéttum með sín sérkenni þegar nemendur brugðu sér í gervi íbúanna í blokkinni. Gleði og einbeitni einkenndu flutninginn, jafnt þegar flutt var talað mál eða lögin sungin. Það voru því þakklátir og glaðir áhorfendur sem héldu heim að skemmtun lokinni. Nemendunum öllum og kennurum þeirra sem stjórnuðu tóku að sér hlutverk leikstjóra eru færðar bestu þakkir.

Þriðjudagskvöldið 16. mars mun Magnús Stefánsson fræðslufulltrúi hjá Marita (forvarnarsviði Samhjálpar) halda fyrirlestur fyrir foreldra um skaðsemi fíkniefna og þá erfiðleika sem neysla þeirra getur valdið. Daginn eftir mun Magnús hitta nemendur í 7.-10 bekk í Hrafnagilsskóla ( á skólatíma) og halda samsvarandi fyrirlestur fyrir þá. Til að fylgja fræðslu nemenda eftir er mikilvægt að foreldrarnir fái líka sömu fræðslu, þó nálgun efnisins sé ólík. Þess vegna boðum við til ofangreinds fundar sem haldinn er í samstarfi við foreldra barna í Valsárskóla og á Grenivík. Á foreldrafundinum verður leitast við að hvetja foreldra til ábyrgðar á börnum sínum og að standa saman. „Menning” unglinga verður kynnt fyrir foreldrum svo þeir séu sem best undir það búnir að takast á við unglingsár barnsins. Börn og foreldrar eru hvött til að ræða um þessi mál sín á milli.
Fyrirlesturinn verður haldinn í Hrafnagilsskóla og hefst klukkan 20.30.
Allir velkomnir
Stjórn Foreldrafélags Hrafnagilsskóla

Lokakeppni Stóru upplestrarkeppninnar var haldin að Möðruvöllum í Hörgárdal 2. mars. Undirbúningur keppninnar hefst á Degi íslenskrar tungu og lýkur í mars en eingöngu nemendur 7. bekkjar taka þátt. Þátttakendur voru 10 talsins frá fimm skólum við Eyjafjörð og í Ljósavatnsskarði þ.e. Þelamerkurskóla, Hrafnagilsskóla, Valsárskóla, Greinivíkurskóla og Stórutjarnaskóla. Fulltrúar okkar í keppninni voru þau Arna Ýr Karelsdóttir og Friðrik Karlsson og stóðu þau sig með prýði. Úrslitin urðu þau að Friðrik sigraði og óskum við honum til hamingju með árangurinn.